這是一次由中學生發動的社會運動。主要由中學生組成的學民思潮 是最早關注國民教育科問題的團體。昨日遊行隊伍中，由幼稚園生到大學生都有。學民思潮 召集人黃之鋒表示，不少同學以往不曾參與7.1遊行，昨日首次上街。他批評政府混淆視聽，歸咎個別教材內容偏頗，無視國民教育科指引才是問題根源。
記者：彭美芳 何詠詩
黃之鋒說，今次遊行吸引大批學生上街，「渠哋冇參加7.1遊行，但今日就出嚟反對呢科，好多人三年後都畢業，根本唔關渠哋事，但因為怕細佬妹俾人洗腦，先至會出曬嚟遊行。」
林鄭言論激發港人上街
對於今次他們推動的社會運動演變成全民運動，黃之鋒認為，政務司司長林鄭月娥把推行國民教育科說是主流民意，是激發更多人上街的原因。他指，撤回國民教育科才是主流民意，政府不應轉移視線，把焦點由國民教育科指引，轉移至教師壓力、《中國模式─國情專題教學手冊》內容偏頗等。
昨日大批學生支持遊行，由幼稚園到大學生都有。香港大學社會科學系二年級學生陳曉程怒斥︰「出嚟為反對洗腦，社會冇公義冇真正自由，教育成為國家機器，人民唔行出嚟都唔知等幾時！」她指國民教育必須有足夠空間供學生討論，「夾硬畀啲咁細慨小朋友接受系好恐怖慨事」。
懷疑政府強推另有目的
中文大學法律系二年級學生黃凱婷認為，盲從國民教育科會荼毒學生，「如果呢個黨系無私進步就唔會殺完人唔認數，好懷疑政府強推系另有目的。萬一教師冇時間備課，惟有跟指引，變咗荼毒學生」。她建議，若把中史變為必修科，學生會思考如何把中國變得更好。
中二的林同學是跨境學童，在廣東住過六年。她指，過去在大陸無法上網看敏感的資料，如六四、王丹這類字眼被阻隔，她和鄰居討論時，發現他們盲目愛國，看不到大陸應改變的地方，更不會重視民主、自由等價值。
林同學認為香港一旦推行國民教育科，會變成跟大陸一樣。同班的陳同學補充：「明明香港系言論自由慨地方，家都冇埋！」
中五的袁同學認為：「李旺陽被自殺、六四事件，呢啲系個個中國人都應該知道，唔可以向學生迴避呢啲事實！」
《大中小學生有嘢講》
只教中國好慨
阿翹（小一）如果推行國民教育科，我會唔開心。今日出嚟上街就系要反對國民教育。唔想九月返學要學呢科，呢科淨系教中國好慨，唔教唔好慨。做功課同考試慨時候要寫中國好先高分，唔好嗰啲就唔提。
唔想似機械人
陳蕙慈（中）（小三）洗腦教育即系令學生做同一樣慨嘢，唔可以有自己慨思想，唔想自己好似機械人咁被人控制。爸爸媽媽有教我，我哋今次出嚟遊行係為咗我哋將來，同埋唔可以被人控制，希望國民教育唔好好似機械人咁，教埋同一樣慨嘢。
教啲嘢唔中立
鄧一信（後）（小四）上街就系要反對國民教育，因為呢科冇公開諮詢，啲教材冇準備好，教啲嘢唔中立，淨系教好嘢都唔好，希望兩樣都教，例如六四。如果功課要我淨系寫好慨都惟有照寫，但我知道事實唔系咁，我會睇新聞，希望教育局考慮我哋慨意見。
我愛國唔愛黨
張同學（小六）國民教育科教我哋要支持共產黨，又講到其他國家好衰，學生批判能力會減弱。我愛國但我唔愛黨，例如會支持中國奧運代表隊，四川地震都會捐錢，希望中國好。
共產黨不可信
蕭浩朗（左）（小五）
何澤龍（右）（小五）在同校就讀小五的蕭浩朗小朋友和何澤龍小朋友，直斥現在的國民教育會降低香港小朋友質素，蕭浩朗小朋友說，「好反對國民教育，國民教育好洗腦，如果有國民教育，香港慨核心價值會冇咗」，又說部份教材「猛踩美國」，但美國國內縱有何不足，起碼民主法治也較健全；何澤龍小朋友說，「唔系唔信國民教育，但系家慨國民教育系教愛黨，共產黨啲人又貪錢，又殺學生」，擔 心「推行國民教育之後香港都會變成咁」。
唔撤回就罷課
溫卓穎（中二）將升中二的觀塘官立中學13歲學生溫卓穎（ Ken）昨由做廚師的溫爸爸，首次帶上街遊行，「要國民教育做乜啫？咁即系要香港用簡體字」。今次上街不只是為了他個人，「因為對我未來，對我下一代同埋再下一代都好重要」。官校一般會被教育局拿作教育政策示範， Ken仔說很擔心學校被迫先行，「讀官校梗系驚俾政府攞嚟做白老鼠」。他批評吳克儉「一啲都唔掂」，「政府再唔撤回慨話，我就要罷課！」
改編歷史唔好
鄭同學（中一）渠（中共）將啲歷史改編，咁樣唔好，只系偏向好慨方面。最好就唔好搞咁多科，學生已經好慘，中一都讀緊十幾科，唔想再讀咁多科，好辛苦！
愛香港唔愛國
張同學（右）（大二）本身在英國讀書已近九年的張同學，昨日和朋友一齊聲援反洗腦教育科，他指自己特意回港參加7.1遊行，為民主發聲。他指在英國的國民教育重視歷史，政治意味不重，「有Citizenship，類似公民教育，冇乜政治，有學歷史，或者果啲好簡單應要做乜、唔應該做乜，冇咁洗腦！ 」他認為，政府無視市民反對聲音，因政治不中立，張同學坦言：「愛港唔愛國得唔得？可能系97出世，奧運（香港）都自己一隊啦！冇必要愛國㗎！」
教法要有批判
葉同學（中三）覺得嗰科好洗腦囉。對於90後嚟講，好抗拒，唔希望我哋之後慨小朋友被影響。如果學校要做國民教育科，咁要用批判思考慨方法教，例如講嚇中國喺國際形勢、表現有乜好壞，唔好只講好慨一面。
負面嘢輕帶過
林永泰（大一）中學參加過廣州交流團，當時 有大陸教授主持講座，全程不斷講規劃同發展成果有幾勁，負面嘢就輕輕帶過。家德育及國民教育科教材偏頗，好明顯有灌輸愛國愛黨精神慨政治目的，應該全面撤回，唔想洗腦名正言順滲透。
課程只講好嘢
溫同學（大三）國民教育課程一面倒，淨系講好嘢，冇講人權，豆腐渣工程又冇提，（溫州）高鐵撞車又冇講。家西環治港，好明顯想由教育入手，令學生覺得共產黨冇問題。其實通識教育已經有教中國國情，唔需要額外多一科，所以一定要撤回。
根本系夾硬嚟
梁同學（大四）政府慨做法令到我哋好憤怒，有五成二市民反對國民教育，吳克儉仲強推，話大部份人支持，根本就系夾硬嚟。雖然遊行未必有用，但我想話畀下一代聽，無論人哋強推乜嘢喺你身上，自己都要有批判思考，要站出來說不！
係為咗下一代
趙同學（中六）共產黨家好有問題，個個高官都貪污，人民連飯都冇得食，基本人權都被剝削。今日出來反國民教育，就係為咗下一代，如果將來渠哋好似大陸咁，以為六四軍隊殺人系理所當然 ，好似冇錯咁。
