評論 > 短評 > 正文

陳劍青: 700公頃政府收地謊言大拆解

作者:

陳茂波話未來5年會用《收回土地條例》收番700公頃新界私人土地,其實系真系想鬥地主、大有為定扮勇武?

睇番清楚個條數,原來口中個700公頃,9成9系現有新發展區講左好多年個堆私人農地,粉嶺北+古洞北(182公頃)、元朗南(223公頃)同洪水橋(324公頃),根本只系重覆用條舊數扮做野,而唔系依家個社會講緊呢堆新發展區外既棕地(例如元朗橫洲)同地產商周圍囤積既農地,所以700講公頃根本就唔會有額外既公屋多左出黎。

跟進左新界囤地收地問題假假地都成10年,當然唔會忘記,700公頃重會收埋陳茂波自己個塊在90年代買落既上萬呎古洞北農地。多謝香港畸型既體制,俾人話「囤地波」咁多年唔單唔駛落台,今日重有得升官發財,同依家林鄭一模一樣。如果古洞北因新發展區而升級去甲級農地賠償,講緊當年買入價約100元/呎今日可賠成1300元/呎,完全不勞而獲炒農地賺上十倍。

從以上分析,會收700公頃好明顯亦都系玩數字遊戲,扮下積極解決房屋問題消弭民憤,因為唔單只翻炒條數,當中既私人農地政府其實有唔少已經同緊地產商進行「原址換地」,即系類似依家講個種「土地共享」咁公私合營私相授受,唔收地產商囤番黎既地直接俾佢地起原址起豪宅。所以700公頃條數會有好多收地水份,換剩既小地主、小農戶既地先會俾政府未來用土收做公屋同設計,當然唔少得收黎起基建俾地產商區內啲私樓地,咁又點會系叫鬥地主呢?

剩系睇全新界最大農民恒基地產最新年報,話到明粉嶺北以前囤落既240萬呎農地有3分1(80萬呎)都換到變屋地,總樓面面積去到400多萬呎,囤中既位重准過歡樂彩虹拋銀仔。四叔買個陣主要系90年代末2000年中末,買既價講緊系200至300/呎,俾你農地轉屋地差唔多double左個呎數不但只,未來系一呎賣成2萬至3萬/呎既天價豪宅,其實最尾又會系咩人買?

對著依家個特區政府真系hopeless,依家一邊走出黎話對話另一邊又開始出黎造假數,以為可以用番以前啲玩數字就呃市民做到野繼續玩利益輸送,所以大家真系唔好簡單以為用土收就解決到房屋問題,因為整個體制已經腐爛到一個點,香港去到呢個田地,囤地波重要黎同你玩數字,偽善至極。

陳劍青,本土研究社成員,專研城市空間、房屋土地問題,致力推動在地民間研究及民間教學。FB: https://www.facebook.com/kimching.geographer

責任編輯: 李廣松  來源:作者臉書 轉載請註明作者、出處並保持完整。

本文網址:https://tw.aboluowang.com/2019/0922/1346255.html