香港蘋果旗艦店就快喺 IFC開張，唔少蘋果忠心粉絲同網民，都熱烈談論呢間香港旗艦店有幾勁，不過蘋果粉絲呢兩日討論焦點，忽然由香港蘋果旗艦店，轉左去北京嘅蘋果三里屯店，原因唔系因為呢間舖嘅裝修幾有蘋果味、又或者有乜特別新產品開賣，而系因為一個電話號碼，同埋一個全中國人嘅心願：「平反六四」。
話說最近有網民發現，北京 Apple Store三里屯店嘅電話號碼系（ 8610） 6419 8900。就咁睇似乎冇乜特別，但系假如將 8個位數字嘅電話碼，刪除最後兩個零，成組數字就變成 641989，再拆開睇就系「 64」、「 1989」，亦即系八九年六四屠城日子。
其實由六四事件二十周年開始，已經不時有大陸新聞工作者、創作人將「八九」、「六四」隱藏在作品入面，曲線表態悼念及支持平反六四，最經典莫過於當年《南方都市報》刊登一輯兒童漫畫，將「八九」、「六四」隱藏喺漫畫入面，所以唔少網民認為， Apple Store呢個隱含「 64」同「 1989」嘅電話號碼，絕對唔系偶然或巧合，而系有北京蘋果員工運用無限創意，利用電話號碼錶達支持平反六四訊息。
網民甚至將電話號碼當正系達文西密碼咁研究，話 6419 8900，應分拆成 64、 1989、 00三組數字，即八九年六四事件入面，官方話天安門廣場入面冇死過人（ 00代表死亡人數），諷刺北京唔認六四有屠城咁話！
有蘋果粉絲同八方講，呢個電話「密」碼，可以話系大陸蘋果粉絲「不能說的秘密」，雖然網上有人貼過出嚟，不過未見官方有任何動靜，蘋果方面亦冇改電話號碼，八方支持蘋果堅持下去，只系唔知幾時阿爺會河蟹呢個「民主電話號碼」啫！
