警方圍困紅磡理工大學留守者踏入第六日，繼在校園外圍播歌外，繼續出動各種招數「勸降」。有傳媒昨晚發布片段，聽到有警察在校園外圍用咪廣播，嘲諷留守者只能食「冷冰冰嘅生命麵包」，自己放工後則可以上深圳食「海底撈」、飲啤酒，「（生命麵包）通常基層拾荒者老人家食，我覺得系好可憐嘅一回事」。
警察的「生命麵包」論在網絡引起譁然，有網民發起今午「和你 Lunch」快閃集會，一同食生命麵包以聲援理大留守者，更表示「食包唔可恥 Popo你食屎」。
《眾新聞》昨晚發布片段，顯示有警員在理工大學外圍繼續廣播「勸降」，期間開咪的警員批評示威者「垃圾」，「我真系覺得你哋好垃圾，又要比人擋住，做又做唔掂、做又做唔好，又無恆心」，「我睇你哋唔起呀！唔系因為我同你政見唔同、立場唔同，系因為你哋做人冇原則、冇底線、冇承擔、冇責任感，同埋冇腦啊。」
該名警員又指，示威者「完全刷新我嘅人生觀、刷新我目光，我（以前）唔覺得香港有人咁蠢嘅」，「但經過依幾個月，我真系發現原來香港咁多人受過高等教育...比我智商、分析能力、或者邏輯能力，系更加低。」
警員叫示威者「懾高枕頭諗一諗」，「唔好淨系收埋你哋自己鍾意睇嗰啲嘢，接觸下出面其他人嘅諗法，擴闊下自己眼光、睇其他人嘅文章」，「你會發現，原來你系錯得好緊要」，「你哋真系喺度發緊夢架！我話你聽，呢個夢好快醒，你哋全部要承擔之前所犯錯誤所帶來嘅惡果」。
該警員又疑大打「心理戰」，嘲諷留守者在寒風中只能食「冰冰冷冷嘅生命麵包」，並言「Okay！你哋鍾意食，無所謂嘅。我哋陪你守三個月、守三個禮拜，都無問題」，「陣間我夠鍾收工，有第二班警察嚟接我，你食生命麵包，我就上深圳食海底撈！哇！諗起都正呀！又可以飲冰凍啤酒！」。該警員又指，生命麵包通常是基層、拾荒者老人家才要食，「我覺得系好可憐嘅一回事。」
今日中午，中環、太古、觀塘等繼續有上班族響應「和你 Lunch」午間快閃行動，有市民在中環交易廣場位置，放下各種口味的「生命麵包」。
