袁弓夷是袁彌明、袁彌昌之父，不但經歷過三段婚姻，名字也有三個。本名袁肅，記者乍聽還道是東京潮區原宿，其實出自《三國演義》，話說東吳將領魯肅木訥易騙，「魯肅戇居居，成日俾諸葛亮搵笨，我老母覺得我好戇居，好鬼老實，同我改個咁嘅名。」肅字筆劃多，媽媽後改弓夷，「搵弓箭射啲夷族，shoot the barbarian!」
昔日中國人指日本為東夷，「我老母話我聽有兩次最開心，一次日本仔投降，一次打倒四人幫。」開弓沒有回頭箭，近來對準北夷，拍片發聲，「第三次就系共產黨冧！」上一代名字真多，他還有個族名，「袁彌昌佢哋系彌字輩，我系世字輩，袁世凱個世，我叫袁世宏。」袁世凱推翻滿清，袁世宏滅誰？
袁弓夷50年沒寫作，今次寫公開信給川普等人如有神助，「好似有少少上天力量，我唔系好迷信，但我有感覺。」
袁弓夷突然火紅，72歲成為年紀最大的KOL，早在港版國安法出台之前他已拍片，預言美國必往中共身上招呼，近來更呼籲香港人參與其中，公投決定自己命運，他在今次訪問解釋：「點解我提議公投？實在冇人代表我哋，立法會班友（包括媳婦容海恩）唔准傾呢啲；人大政協去北京開會，邊個代表我哋，你投票選㗎？我哋俾人deprived of the right，我有責任提議香港人我哋應該攞番個權，共產黨就話你港獨、分裂國家，X佢乜都有得講啦！」
公投必須外國監察，只怕要加上勾結外國勢力罪名，袁爸爸翻舊帳：「正式勾結外國勢力系中共，毛澤東喺江西時唔叫中國，叫蘇維埃，佢系大蘇聯嘅一部份。」這裡說的是中華蘇維埃共和國臨時政府，另外抗日戰爭也因外國勢力而勝，「如果唔系兩粒原子彈飛過去，我哋今日講緊日文，向天皇敬禮呀！唔系講笑，如果英國唔同美國同盟，佢講緊德文呀！蘇聯都講緊德文，當日蘇聯都系同盟國，Heil Hitler呀！」
他是典型企業家勇往直前，從不左思右想，「又怕痛又話西裝皺咗，點搞？嗰班律師真系咁。」這裡說的是公民黨，想不到他抨擊泛民，「好多時因為佢哋怕痛所以搞到今日咁彎，如果佢哋早啲頂住，唔會搞到今日咁彎，????家冇得救。」川普則歸咎前幾任總統養虎為患，袁弓夷說：「歐巴馬系衰人嘛，攞咗Nobel Prize（諾貝爾和平獎）之後成日明哲保身，呢條友乜都唔做，共產黨應承佢嘅嘢唔做佢又唔理，即系我突然畀個貞節牌坊你，你都唔敢出去滾啦！」
萬惡錢為首
據他所知港版國安法志在掠水，這裡要從2017年說起， 大陸富商肖建華被人從香港四季酒店帶走，押返 大陸，導致去年《逃犯條例》修訂風波，「佢整個送中重複肖建華（事件），但合法地帶佢返去，然後分曬佢海外啲錢，呢個系送中主要目的，真係為咗錢。」今次國安法延續去年未完的夢，目標同是官、紅二代在港約二萬億元資產，兩次港官都聲稱只針對一小撮人，一般市民不用擔心。
清算官、紅二代之後，輪到本地富豪上場，「我話你聽，有錢佬實際至大鑊！」袁爸爸說：「我懷疑你，我調查你，條友驚到瀨尿，乜都畀曬佢啦，大佬我要自由！國安法完全有權做呢樣嘢，香港咁鬼多闊佬，我派咁多公安嚟，呢次系發財機會喇！你擔保呢樣嘢唔會發生？將來呢樣嘢至系主題！」
袁弓夷父親袁勃是本港照相業大王。
富豪頭上一把刀
以後 大陸執法人員公然來港， 大陸術語稱為刀把子，「有咗呢班友，到佢哋撈嘢，你冇罪最好，冇罪有錢就得。反而拉嗰班細路唔系主題，佢仲以為咁樣做咗美國會多謝佢，社會安定大家齊齊賺錢囉。」袁弓夷在北京、華盛頓廣交朋友，消息靈通，有一件事可以窺見北京做甚麼都為了錢，「我講件真事你聽，佢哋（京官）話香港發生咁多嘢，到底????仔要乜嘢？我話自由、民主、法治，佢話呢啲系虛嘅，因為佢哋從來未嘗試過。」
搞清楚習大大真正目標是誰，因此無懼發聲？「我哋香港人took him too seriously，佢嘅政績未成功做過一件事，冇一件事佢唔爛尾，你得閒搵一件畀我。」袁爸爸強調從沒考慮自身安全，問題是如何消弭港人之憂？「我話你聽，我冇責任令佢哋唔擔心，我嘅責任唔系pacifier，你唔想BB仔喊就畀個奶嘴佢，就系pacifier，我唔系畀個奶嘴你等你唔喊，呢個唔系我責任，我嘅責任系要解除病毒，叫做共產病毒，否則我家人、後代、我哋中國人冇前途。」
記者追問，假如港版國安法針對官、紅二代，香港平民百姓不用擔心？「你唔逼我講我都講，我唔鍾意講大話，實際我唔信佢有咁嘅威力、持久力可以撐落去。」訪問至此才說穿，他不擔心立法，卻向美國高聲求救，還望川普大功告成，大家不妨學習袁氏心法，「所以我同你講，以我判斷（國安法）唔掂，佢撐唔落去，但如果我系美國人我當睇唔到，當你呢個系真，我橫掂都要打你，搵到咁好機會我仲唔撲X你？我幾大唔信都要信，我扮信啦！」
曾結婚三次的袁弓夷，袁彌望（大女）、袁彌昌、袁彌明是同母所生。
愛國是一場戲
袁弓夷是浙江寧波人，1953年父親袁勃來港，後來成為照相業大王，媽媽在 大陸傳教，1956年被判勞改，兩個妹下鄉，翌年輪到他本人逃亡香港，記者問他對中共有過希望嗎？「我系香港第一個入去開工廠，改革開放，鄧小平未出嚟我就入去，我入到去覺得好奇怪，分唔出邊個好人邊個壞人。」他答道：「我可以咁講，從來對佢冇希望。」不說中共，對國家有感情？「對國家講感情根本系多餘，國家系衰人你都對佢有感情？希特勒捧住德國專做壞事，你愛德國？（二戰）日本又系，你愛日本？」
他認為國家憲章代表人民的協議、原則，才是人民所愛，「乜嘢愛國、民族精神，X嗰啲全部呃人！」問題來了，袁弓夷、早前逝世的李鵬飛、唐英年早逝之父唐翔千當年都是第一批北上設廠的港商，袁更將廣州工廠送給國家，如非愛國還有何因？「送咗廠之後，畀我一個好嘅道理救我老母、兩個妹出嚟，因為我系愛國商人，所以佢放我兩個妹、我老母。唔系因為我愛國，亦唔等於我愛國，根本全部都系做戲！乜嘢愛國呀，X你真系唔好信呢啲啦，愛國兩個字都唔能夠信。」
袁氏生意無數，旗下Tele-Art Inc是首家在納斯達克上市的全港資電子企業，他在 大陸20年卻蝕了幾千萬元，分毫未賺過，發現大陸人不想賺錢，只想騙財。今次發聲前斷絕國內所有生意，明言不會再對這個政權作出任何貢獻，「冇可能又要賺佢哋錢又鬧佢哋，因為生意人對錢都有感覺，既然你講嘢要夠膽講、直講、冇保留冇拘束咁講，你點可以同時賺緊錢？我冇咁叻。」
據他說港商北上一定滾紅滾綠，被拍下床上英姿，一旦阿爺吹雞埋位往往身不由己，「我真系唔多，啲友去東莞我唔鍾意去。」唯獨他是例外，因此瀟灑得起，「冇滾過就呃你嘅，我好早出道，21歲出嚟做生意，好早掂過呢啲嘢，冇乜刺激。」十個男人九個去滾，一個諗緊，難得袁爸爸直認，「梗系啦，男人唔滾邊系男人呀，有冇講錯？」
