八方一向有拜讀嘅《陽光時務周刊》，最近出現連環大地震，震央波及來自《南方》報系嘅前高層。繼總編輯程益中喺3月初求去之後，上個星期雜誌社同事再收到一個唔系好開心嘅消息，就系主編長平都起身走人。唔少人都覺得事出突然，認為長平離開系好可惜，矛頭直指系咪老闆陳平過度插手干預運作?據聞有員工諗緊系咪要寫封聯署反映員工心聲。
主編長平也劈炮
長平系《南都周刊》前副總編輯，經常因打擦邊球被處分，2011年「被辭職」，舊年加入咗《陽光時務》，深得同事敬重。但系喺上星期出版嘅《陽光時務》，對於佢嘅去留就露出端倪。事關本雜誌每期都會有由長平親自撰寫嘅〈主編的話〉，但上一期個版就冇咗〈主編的話〉呢四粒字，只得一篇長平署名文章。到咗上周五，同事就收到長平電郵，話自己唔再系主編。
長平走人，表面原因系佢未能取得工作簽證嚟香港，經常要遙控編務。但有知情者就同八方講，據聞佢同之前劈炮嘅程益中、仲有執行主編張潔平一樣，都系頂唔順老闆陳平事事干預嘅作風，所以唔撈。陳平雖然未去到干預新聞自由咁嚴重，之但系經常喺起題用字、報導方向方面，都同專業嘅編採人員拗餐飽，令人好氣餒咁話。
據聞長平走人，會由筆名雨文嘅香港總監唐朝雯頂住先。但同事現時士氣低落，只希望陳平唔好咁多聲氣，畀佢哋正正常常咁發揮，做多啲好新聞。
